အိမ်ထောင်သက်ကြာလာတဲ့အခါ အမျိုးသမီးတချို့သူတို့ခင်ပွန်းကိုမုန်းသွားရတဲ့အကြောင်းရင်း

လက်ထပ်ထားတာကြာလာတဲ့အခါ တချို့သူတွေက အရင်အတိုင်းချစ်မြဲချစ်ဆဲဆိုပေမယ့် တချို့တွေကျတော့ တစ်ယောက်နဲ့တစ်ယောက် အချစ်တွေလျော့သွားသလို၊ စိမ်းသွားသလိုဖြစ်တတ်ပါတယ်။ အဲ့ဒီလိုအခြေအနေမှာ ဒီအချက်တွေဖြစ်နေရင် အမျိုးသမီးတွေက သူတို့ခင်ပွန်းကို မုန်းတဲ့အထိတောင်ဖြစ်သွားတတ်ပါတယ်။

(၁) မိသားစုအတွက်အချိန်မပေးတာ

အိမ်ထောင်သည်တစ်ယောက်အတွက် မိသားစုကပထမဦးစားပေးရမယ့်အရာဖြစ်ပါတယ်။ ကိုယ့်မိသားစု၊ ကိုယ့်ဇနီးမယားကို အချိန်မပေးဘဲ အလုပ်များတာကိုအကြောင်းပြပြီး အပေါင်းအသင်းတွေနဲ့ပဲအချိန်ကုန်နေတာ၊ အိမ်မှာထက်အပြင်မှာပဲ ပျော်မွေ့နေတာက ဇနီးတစ်ယောက်ရဲ့ စိတ်ထဲမှာ နာကျင်စေပါတယ်။ ကိုယ့်မိသားစုကိုအချိန်မပေးဘဲ အပြင်မှာပဲပျော်မွေ့နေတာမျိုးကို မိန်းမတွေက စိတ်ပျက်၊မုန်းတီးတတ်ပါတယ်။

(၂) ဆုံးဖြတ်ချက်ချဖို့မတိုင်ပင်တာ

မိသားစုဆိုတာက တစ်ခုခုအတွက်ဆုံးဖြတ်ချက်ချတဲ့အခါ အားလုံးတိုင်ပင်ပြီး အတူတကွဆုံးဖြတ်ကြရမှာပါ။ တစ်ယောက်တည်းသဘောနဲ့ ဆုံးဖြတ်ချက်ချတာက တစ်ကိုယ်ကောင်းဆန်တာဖြစ်ပြီး မိသားစုကိုစိတ်ဝမ်းကွဲစေပါတယ်။ မတိုင်ပင်ဘဲ တစ်ယောက်တည်းသဘောနဲ့ဆုံးဖြတ်တာမျိုးက ဇနီးတွေကို စိတ်ပျက်စေပါတယ်။

(၃) ကတိမတည်တာ

စကားတစ်ခွန်းကိုအလွယ်ပြောပြီး ကတိတွေကို လွယ်လွယ်ပေးပြီးမတည်တာကလည်း တစ်ဖက်လူကိုစိတ်ပျက်စေပါတယ်။ ကတိပျက်တာများတဲ့ယောကျာ်းကို မိန်းမဖြစ်သူက တဖြည်းဖြည်းစိတ်ပျက်၊စိတ်ကုန်လာတာ မဆန်းပါဘူး။

(၄) အတ္တကြီးတာ

အတ္တကြီးပြီးအနိုင်ယူတတ်တဲ့အိမ်ထောင်ဦးစီးတစ်ယောက်ကြောင့် မိသားစုက တဖြည်းဖြည်းပျော်ရွှင်မှုတွေဆိတ်သုဉ်းလာတတ်ပါတယ်။ အတ္တကြီးပြီးအနိုင်ယူတာက မိန်းမတစ်ယောက်ရဲ့အချစ်စိတ်တွေကို လျော့နည်းလာစေပြီး သူအရမ်းချစ်တဲ့သူကိုတဖြည်းဖြည်းမုန်းတီးလာတတ်ပါတယ်။

 

(၅) သစ္စာမရှိတာ

မိန်းမတွေက အိမ်ထောင်ရေးနဲ့ပတ်သက်လို့ အစစအရာရာခွင့်လွှတ်သည်းခံနိုင်ပေမယ့် သူတို့အပေါ်သစ္စာမရှိတာ၊ သစ္စာဖောက်တာကိုတော့ သည်းမခံနိုင်ပါဘူး။ တခြားမိန်းကလေးတွေနဲ့အရောတဝင်နေတာမျိုး၊ ခြေရှုပ်တာမျိုးက မိန်းမတစ်ယောက်အဖို့ သူအရမ်းချစ်တဲ့ယောကျာ်းကိုတောင် မုန်းသွားနိုင်ပါတယ်။

written by PP